Program dal Concors par Tescj Cinematografics in Lenghe Furlane (XI edizion)

CONCORS PAR TESCJ CINEMATOGRAFICS IN LENGHE FURLANE
2016 – XI edizion
Regolament

1 – E je stade fissade la XI edizion dal Concors par Tescj Cinematografics in Lenghe Furlane.
Il concors al à chê di prudelâ la scriture di senegjaturis, di storiis par films, di articui di critiche di films (no furlans) presentâts li de Mostre dal Cine 2015 e di saçs cinematografics par furlan, deventant cussì une palestre par autôrs e critics di cine.

2 – Il concors al sarà dividût in cuatri sezions:
Sezion a) dedicade aes senegjaturis di luncs o mezanmetraçs (massim 30.000 batudis);
Sezion b) dedicade ai articui di critiche dai films no furlans presentâts ae Mostre dal Cine 2015 (massim 3 cartelis);
Sezion c) dedicate aes storiis par film (massim 10 cartelis);
Sezion d) dedicade ai saçs sul cine (massim 10 cartelis).
Une jurie e sarà metude sù par dâ chescj premis:
Sezion a) prin premi € 1.500; segnalazions, se dal câs
Sezion b) prin premi € 400 ; segnalazions, se dal câs
Sezion c) prin premi € 250; segnalazions, se dal câs
Sezion d) prin premi € 250; segnalazions se dal câs
La jurie, li che no crodi valevul nissun dai lavôrs presentâts, e pues decidi di no dâ un o plui dai premis previodûts. Lis voris premiadis a saran publicadis su la riviste anuâl di cine Segnâi di lûs. Dut câs, a podaran jessi publicadis su la stesse riviste ancje chês segnaladis e chês judicadis plui interessantis, intal stes an o in agns seguitîfs.

3 – A son ametûts in concors dome i lavôrs in lenghe furlane, scrits di un o plui autôrs. Lis senegjaturis a àn di jessi scritis par furlan comun e inte grafie uficiâl pes parts tecnichis e descritivis (a son ametudis lis varietâts pes parts dialogadis simpri tal rispiet de grafie uficiâl). Lis storiis par film, i articui critics e i saçs a varan di jessi scrits par furlan comun e inte grafie uficiâl. Lis voris a varan di jessi presentadis rileadis, cu lis pagjinis numeradis e datiloscritis. Ogni concorint o grup di concorints al pues partecipâ dome cuntun lavôr par ogni sezion.

4 – No son ametudis al concors lis senegjaturis o lis storiis di films che a son za in lavorazion ae date di assegnazion dai premis.

5 – Par partecipâ al concors, i lavôrs a varan di jessi o inviâts par pueste (si tignarà cont dal timbri postâl) o consegnâts a man, in dople copie, li dal Centro Espressioni Cinematografiche in vie Villalta, 24 a Udin UD, dentri dai 11 di Setembar dal 2016. Lis voris a partecipin al concors in forme anonime fin ae fin dai lavôrs de comission judicante. Par garantî l’anonimât, i concorints a varan di segnâ lis lôr voris dome cul titul, evitant ogni pussibile identificazion dal o dai autôrs. Tal câs di spedizion par pueste si à di segnâ, sei tant che mitent sei tant che destinatari, la direzion dal CEC. La vore, metude intune buste sierade, e à di jessi compagnade di une seconde buste sierade cun dentri lis gjeneralitâts, la direzion e i numars telefonics dal autôr o dai autôrs, dutun cuntune declarazion che e certifichi, sot de responsabilitât dal concorint, che il lavôr mandât nol va cuintri des normis di chest regolament, regolament che al ven acetât in automatic di cui che al partecipe biel che al mande la opare al concors adun cuntune declarazion par autorizâ il CEC a publicâ a gratis la vore, fale eventuâi dirits di autôr leâts ae realizazion des storiis e des senegjaturis in film.

6 – Ducj i dirits dai lavôrs in concors, ancje chei segnalâts e premiâts, a restin a ducj i efiets di proprietât dai autôrs. I datiloscrits mandâts no vignaran tornâts indaûr e a restaran a disposizion dal archivi dal CEC.

7 – La jurie e concludarà i lavôrs dentri dal mês di Otubar dal 2016 cu la selezion des voris. La cerimonie di premiazion si davuelzarà inte suaze di une serade speciâl che si tignarà tal mês di Dicembar dal stes an.

8 – Tal câs li che lis senegjaturis o lis storiis premiadis a vegnin realizadis in film, i vincidôrs si impegnin a segnalâ il Concors tai titui dal film stes.

Atenzion: La sezion B dal bant dal Concors par Tescj Cinematografics 2016 e amet dome articui di critiche sui films no furlans presentâts li de Mostre dal Cine 2015.

loghi-Segnai-di-lus-2014